1. Яллагдагчийг цагдан хорих үндсэн хугацаа 1 сар хүртэл байна.
Энэ хэсэгт 2024.01.17-ны өдрийн хуулиар “1 сар” гэсний дараа “хүртэл” гэж нэмэлт оруулсан бөгөөд 2024.08.01-ний өдрөөс эхлэн дагаж мөрдөнө
2. Шүүх энэ хуулийн 14.9 дүгээр зүйлийн 1 дэх хэсэгт заасан үндэслэл арилаагүй гэж үзвэл яллагдагчид авсан цагдан хорих таслан сэргийлэх арга хэмжээний хугацааг тухай бүр 1 сар хүртэл хугацаагаар сунгах ба яллагдагчийг цагдан хорих нийт хугацаа Эрүүгийн хуульд хорих ялын дээд хэмжээг таван жил хүртэл хугацаагаар оногдуулахаар заасан гэмт хэрэгт 6 сараас, Эрүүгийн хуульд хорих ялын дээд хэмжээг таван жилээс дээш хугацаагаар оногдуулахаар заасан гэмт хэрэгт 12 сараас, Эрүүгийн хуульд хорих ялын доод хэмжээг найман жил, түүнээс дээш хугацаагаар оногдуулахаар заасан гэмт хэрэгт 18 сараас хэтэрч болохгүй.
Энэ хэсгийг 2024.01.17-ны өдрийн хуулиар өөрчлөн найруулсан бөгөөд
2024.08.01. -ний өдрөөс эхлэн дагаж мөрдөнө/
3. Эрүүгийн хуулийн 10.1 дүгээр зүйлийн 2 дахь хэсэг/Хүнийг хүндрүүлэх нөхцөл байдалтайгаар санаатай алах/, 17.1 дүгээр зүйлийн 3 дахь хэсэг/Хүндрүүлэх нөхцөл байдалтайгаар хулгайлах/, 17.3 дугаар зүйлийн 3 дахь хэсэг/Хүндрүүлэх нөхцөл байдалтайгаар залилах/, 19.6/Хорлон сүйтгэх/, 29.5/Төрлөөр устгах/ дугаар зүйлд заасан гэмт хэргийн яллагдагчийг энэ зүйлийн 2 дахь хэсэгт зааснаас илүү хугацаагаар цагдан хорих шаардлагатай бол шүүх 6 сар хүртэл хугацаагаар нэмж сунгаж болно.
Энэ хэсэгт 2024.01.17-ны өдрийн хуулиар “17.1 дүгээр зүйлийн 3 дахь хэсэг/Хүндрүүлэх нөхцөл байдалтайгаар хулгайлах/,” гэсний дараа “17.3 дугаар зүйлийн 3 дахь хэсэг/Хүндрүүлэх нөхцөл байдалтайгаар залилах/,” гэж нэмэлт оруулсан бөгөөд 2024.08.01-ний өдрөөс эхлэн дагаж мөрдөнө
4. Нэг хэрэгт дахин, эсхүл тусгаарласан, нэгтгэсэн хэрэгт шинээр цагдан хоригдсон бол өмнө нь цагдан хоригдсон хугацааг нийт цагдан хоригдсон хугацаанд оруулж тооцно.
5. Баривчлагдсан хугацааг цагдан хорих хугацаанд оруулж тооцно. Баривчлагдсан 24 цаг хүртэл хугацааг цагдан хоригдсон 1 хоногоор тооцно.
6. Мөрдөгч яллагдагчийг цагдан хорих хугацааг сунгах тухай саналаа хугацаа дуусахаас 7-оос доошгүй хоногийн өмнө прокурорт хүргүүлнэ.
Энэ хэсгийг 2024.01.17-ны өдрийн хуулиар нэмсэн бөгөөд 2024.08.01-ний өдрөөс эхлэн дагаж мөрдөнө
7. Прокурор мөрдөгчийн саналыг үндэслэлтэй гэж үзвэл цагдан хорих хугацааг сунгах тухай саналаа даруй шүүхэд хүргүүлнэ.
Энэ хэсгийг 2024.01.17-ны өдрийн хуулиар нэмсэн бөгөөд 2024.08.01-ний өдрөөс эхлэн дагаж мөрдөнө
8. Шүүх цагдан хорих хугацааг сунгах тухай прокурорын саналыг хугацаа дуусахаас 4-өөс доошгүй хоногийн өмнө хянан хэлэлцэж, цагдан хорих хугацааг сунгах, эсхүл сунгахыг татгалзах тухай шийдвэр гаргана.
Энэ хэсгийг 2024.01.17-ны өдрийн хуулиар нэмсэн бөгөөд 2024.08.01-ний өдрөөс эхлэн дагаж мөрдөнө
9. Энэ зүйлийн 2, 3 дахь хэсэгт заасан яллагдагчийн цагдан хорих хугацааг баривчилсан өдрөөс, эсхүл яллагдагчийг цагдан хорьсон өдрөөс эхлэн прокурор хэргийг шүүхэд шилжүүлэх хүртэл тоолно.
Энэ хэсгийг 2024.01.17-ны өдрийн хуулиар нэмсэн бөгөөд 2024.08.01-ний өдрөөс эхлэн дагаж мөрдөнө
10. Шүүгч баривчилсан, цагдан хорьсон цагийг захирамждаа заана.
Энэ хэсгийг 2024.01.17-ны өдрийн хуулиар нэмсэн бөгөөд 2024.08.01-ний өдрөөс эхлэн дагаж мөрдөнө
11. Эрүүгийн хэргийг шүүхэд хянан шийдвэрлэх явцад прокурор, оролцогчийн гаргасан саналыг харгалзан шүүх эрүүгийн хэрэг хянан шийдвэрлэх ажиллагааны зорилтод нийцүүлэн шүүгдэгчид цагдан хорих таслан сэргийлэх арга хэмжээ авч болно.
Энэ хэсгийг 2024.01.17-ны өдрийн хуулиар нэмсэн бөгөөд 2024.08.01-ний өдрөөс эхлэн дагаж мөрдөнө
12. Эрүүгийн хэргийг шүүхэд хянан шийдвэрлэх явцад шүүгдэгчийг цагдан хорьсон хугацаа нь энэ зүйлийн 2, 3 дахь хэсэгт заасан хугацаанд хамаарахгүй.
Энэ хэсгийг 2024.01.17-ны өдрийн хуулиар нэмсэн бөгөөд 2024.08.01-ний өдрөөс эхлэн дагаж мөрдөнө